سعودی عرب میں ہجرت رسول کا نمائشی پروجیکٹ
یہ میرے گھر سے الخبر شہر کی طرف جاتے ہوئے الظھران کے راستے میں اربوں ڈالرز سے بنایا جانے والا پروجیکٹ کنگ عبدالعزیز انٹرنیشنل کلچرل سینٹرل King Abdulaziz Center for World Culture جسے (اثرا) Ithra کے نام سے خاصی مقبولیت حاصل ہے، یہ اس وقت سعودی عرب کی تمام ثقافت و روایات کے مرکزی منبع کے طور کام کررہا ہے، سال بھر یہاں مختلف اقسام کے کلچرل ایونٹس ہوتے ہیں، سعودی فلم سازی، عربی خطاطی، پینٹنگز وغیرہ کے علاوہ سیاحت کی تربیت، مقامی ہنرمندی، فیشن انڈسٹری کے علاوہ حجاز کے تاریخی پہلوؤں کو بھی اجاگر کرنے پر کام کررہا ہے ۔
اثراء Ithra ایک مختلف نوعیت کا تاریخی کام کے پروجیکٹ کا آغاز کرچکا ہے ، جو ھجرہ مبارکہ نمائش کارواں ہے، جو رسول ﷲ صلی اللہ علیہ وسلم کے مکہ سے مدینہ منورہ ہجرت کے تاریخی واقعات کو آج کے عہد میں نمایاں کرنے کےلیے ایک اپنی نوعیت کی پہلی متحرک نمائش ہوگی، رسول ﷲ صلی اللہ علیہ وسلم کی ہجرت مبارکہ اسلامی تاریخ کا ایسا واقعہ ہے جس نے بنی نوع انسان کی تاریخ کا دھارا موڑا تھا، اس نمائش کا عنوان ھجرۃ رسول اللہ صلیٰ اللہ علیہ و سلم کے نقش قدم کے نام سے رکھا گیا ہے۔ اس کا آغاز اگلے ھجری سال سنہ ھجری ۱۴۴۴ یعنی 2022 ء کے اواخر سے شروع ہوکر اور 2023ء تک رہے گا۔
اس شاندار نمائش کی ابتداء کنگ عبدالعزیز انٹرنیشنل کلچرل سینٹرل King Abdulaziz Center for World Culture سے ہی شروع ہوگی، جس میں اسلام کے ابتدائی دور میں حجاز کی تاریخ اور اسی عہد کے اہم نوادرات کو شامل کیا جائیگا۔
اس نمائش میں اسلامی تہذیب و تمدن کی ابتداء و اہمیت کو دکھایا جائے گا، خصوصاً رسول ﷲ صلی اللہ علیہ وسلم کے ورثے کے تنوع کو نمایاں کیا جائے گا۔ نمائش کے ذریعے ہجرت مبارکہ سے تعلق رکھنے والے واقعات کو مختصر فلموں اور تصویری مناظر کے ذریعے نمایاں کیا جائے گا۔ اس کے بعد یہ نمائش بتدریج سعودی عرب کے بڑے و مرکزی شہروں کا رخ کرے گی، بعد ازاں دنیا بھر کے کئی ممالک کے متعدد بڑے شہروں تک یہ نمائش ھجرہ طیبہ جائے گی۔
اثراء Ithra نے اس پروجیکٹ کے لئے کئی مقامی سعودی اسپونسرز اور بین الاقوامی اداروں کے تعاون اور شراکت سے ھجرہ طیبہ کے معاہدے بھی کر رہی ہے، جس سے یہ ایک معلوماتی پروجیکٹ کے علاوہ معاشی طور پر بھی ایک کامیاب پروجیکٹ ہو گا بلکہ کئی مقامی و غیرملکی افراد و اداروں کے لئے روزگار کے مواقع بھی پیدا کرے گا۔ مزید یہ ایک اپنے طرز کا انفرادی متحرک نمائشی پروجیکٹ ہوگا، جو اسلام کے ابتدائی ادوار کی آگاہی اور رسول ﷲ صلی اللہ علیہ وسلم کی اسلام کی راہ میں مکہ تا مدینہ کی ہجرت کی ایک تصوراتی و نوادرات کی مدد سے علمی آگاہی فراہم کرے گا۔
